Habal-habal natagak sa pangpang

CEBU, Philippines - Patay ang usa ka habal-habal driver human kini natagak sa pangpang uban sa iyang motor ug naangol ang iyang pasahero kagahapon sa udto sa Barangay Agsungot sa dakbayan sa Sugbo.

Sumala pa sa text messages nga gipadangat ni Joy Tumulak, ang operations chief sa City Traffic Office Management (CITOM) dinhi sa Banat News, ang namatay naila nga si Jason Magdadaro, 26.

 Samtang naangol si Amon Roel Alcansado, 39, taga Guadalupe sa dakbayan sa Sugbo.

Nasuta sa imbestigasyon nga kusog ang dagan sa drayber samtang naglugsong ang iyang habal-habal sa sa kurbadahon nga dalan sa maong dapit.

Tungod sa kakusog, wa na niya makontrol ang manobela pag-abot  kurbada ug milahos ang motor sa kilid sa dalan dayong  tagak nila sa pangpang nga gibanabanang 30 ka tiil ang gilawmon.

Matud pa nga mitugpa ang mga biktima sa batoon nga dapit hinungdan sa ilang naangkong kadaot sa kalawasan.

Gidala sa Cebu City Medical Center ang duha apan patay na si Magdadaro samtang padayon pang giatiman sa mga doktor si Alcansado.  (BANAT NEWS)