Radio broadcaster gipusil patay
CEBU, Philippines - Patay ang blocktime radio broadcaster human kini gipusil sud sa iyang sakyanan duol sa dyRD radio station sa Tagbilaran City kagahapon.
Ang namatay mao si Maurito Lim, gibanabanang 70-anyos, ug naila sa iyang blocktime program nga “Chairman Mao on Board” sa maong sibyaanan.
Gidala pa unta sa kasikbit nga tambalanan sa Gov.Celestino Gallares Memorial Hospital apan nakabsan kini sa kinabuhi tungod sa usa ka samad pinusilan sa iyang wala nga dunggan nga milapos sa pikas dunggan.
Sumala pa sa imbestigasyon sa kapolisan ang biktima luwan sa Izusu Crosswind nga kolor maroon dihang nahitabo ang pagpamusil.
Ang nag-inusarang mamumuno gikatahong misakay og motorsiklo nga gi-park duol sa nahitaboan ug misibat palayo sa dapit.
Gisusi na sa kapolisan ang closed-circuit television camera sa maong sibyaanan nga giingong nakatutok sa crime scene atol sa hitabo. Padayon pa ang imbestigasyon sa motibo sa maong pagpatay.
Ang biktima usa ka negosyante apan nagpadayon sa iyang pagpanibya. Sakop siya sa Bohol Tri-media Association (BTMA) pinangulohan ni Peter Dejaresco nga maoy tag-iya sa dyRD ug semi-weekly newspaper, ang The Bohol Chronicle. (BANAT NEWS)
- Latest
