CEBU, Philippines - Patay na nga naabot sa tambalanan ang usa ka 65-anyos nga lolo human nabanggaan sa usa ka dump truck sa highway sa Sitio Libertad Barangay Bagay lungsod sa Daanbantayan.
Ang namatay mao si Emiliano Ugsang, nagpuyo sa maong lugar.
Samtang ang drayber sa dump truck giila nga si Arnolfo Siasat, 36, taga Dalingding Norte, Daanbantayan.
Matud pa ni Police Officer 3 Victor Avenido ang desk officer sa Daanbantayan Police nga nahinabi sa Banat News, naandan na sa biktima nga anha mosubay sa tungatunga sa dalan kun kini maglakaw-lakaw.
Atol sa hitabo, padung na pauli ang biktima ug sa gihapon sa tunga kini sa kalsada nagsubay hinungdan nga napunggit kini sa dump truck gikan sa Poblacion padung sa dakbayan sa Sugbo.
Maayong pagkalukot sa biktima sa kalsada ug dali nga gidala sa Daanbantayan District Hospital apan nakabsan sa iyang kinabuhi.
“Katarungan ato niya nga sagad daw sa mga namatay sa kalsada naa sa daplin mao daw nga magpatunga na lang daw kung moagi sa kalsada, ang mga driver na lang diri nga nakaila sa iyaha ang mopadaplin kung makit-an siya kay di man g’yud mopadaplin bisan unsaon pa nimo og sirbato,” matud pa ni Avenido.
Hangtud karon wala pa’y sakop sa pamilya sa namatay ang mipakita sa buhatan sa kapulisan aron mopasaka og kaso kung asa ‘sab temporaryo nga gitanggong ang drayber sa dump truck. (Jojo C. Ugdol/EIM)(BANAT NEWS)