CEBU, Philippines - Gipangita karon ang unom ka armas nga nga gi-isyu sa Kapitolyo panahon sa administrasyon ni kanhi gobernador ug karon Kongresista Gwendolyn Garcia.
Sa report sa Provincial General Services Office, lima ka kalibre .38 ang wala pa nauli kansa’ng acknowledgement receipt of equipment (ARE) gipirmahan ni Edwin Mixdon, kanhi executive assistant ni Garcia.
Matud ni Tess Redoble, ang property manager sa PGSO, nga ang ubang armas nga gi-isyu ngadto kang Mixdon giapod-apod sa mga security personnel ni Garcia kinsa uban kanila mga sakop sa Philippine National Police.
“Si Edwin Mixdon gyud ang accountable kay siya man chief. Actually, wa na sa iyaha ang mga armas pero siya man ang nagpirma,” sigun ni Redoble.
Gibutyag ni Redoble nga usa sa maong mga polis niangkon nga nawala ang armas nga anaa kaniya.
“He has to pay for it which worth P28, 000. But ongoing pud ang investigation ana,” matud niya.
Laing usa ka armas nga wala pa nauli gi-isyu kang Atty. Roy Salubre, kanhi provincial treasurer, kinsa gitangtang sa Ombudsman sa katungdanan.
Matud ni Redoble nga sa kadaghang higayun na nga nagpadala og demand letters ang Kapitolyo ngadto sa maong opisyales apan wala’y tubag nga nadawat gikan kanila.
Niduso na og report ang PGSO sa buhatan sa gobernador alang sa tukma’ng lakang nga buhaton.
Gihimo usab ang inventory sa maong mga butang aron iduso ngadto sa Commission on Audit. (Michael Vencynth H. Braga/GMR)(BANAT NEWS)