CEBU, Philippines - Nanawagan ang mga residente sa may dalan Juan M. Ceniza sa barangay Looc, dakbayan sa Mandaue nga ipahunong ang operasyon sa Oriental Port and Allied Services Corporation (OPASCOR) tungod sa kahasol sa dagku’ng sakyanan.
Usa ka petisyon ang gipadangat kang barangay kapitan Cesar Cabahug kinsa niduso usab niini ngadto kang Mayor Jonas Cortes ug sa konseho sa dakbayan.
Si City Planning Officer, Architect Florentino Nimor, niingon nga gisusi na ang reklamo.
Nunot niini si Nimor niingon nga ang pagbutang og bag-ong trucking services sa reclamation area sa dakbayan sa Mandaue higpit na nga idili.
Magpabilin ang kasamtangang mga truck services apan giklaro ni Nimor nga dili sila kaseguro hangtud kanus-a sila magpabilin.
Kini gumikan kay may gihan-ay na nga mga proyekto sa maong lugar ug alang sa kalamboan sa dakbayan. Mga dapit nga gitumbok nga haum kabalhinan sa mga trucking services ang barangay Paknaan, Labogon ug Umapad diin nahimutang ang mga pabrika nga mogamit sa mga trucking services. (BANAT NEWS)