CEBU, Philippines – Nadakpan ang tulo ka gikatahapang pusher sa managlahi’ng dapit sa lungsod sa Consolacion.
Sa District 3, barangay Pulpogan, maoy nadakpan sa ginukdanay sa mga barangay tanod ang duha ka tawo nga nagsakay og motorsiklo nga ilang gidudahan nga namalit og shabu.
Si Police Officer 1 Socrates Borinaga sa Consolacion Police Station niila sa nadakpan nga sila si Benedict Adoro, 23 ug Dave Mark Sasing, 21, pulos taga Purok Molave, Tayud, Liloan. Matud ni Borinaga nga ang hepe sa tanod sa Pulpogan nga si Romil Jumao-as kuyog sa iyang mga sakop ang nakasigpat sa duha alas 12 pasado sa tungang gabii nga ni-parking sa ilang motorsiklo sa maong lugar.
Diha’ng nakakita sa mga barangay tanod, kalit lang nanagan sa ngitngit nga lugar ang suspek ug gibilin ang ilang motorsiklo.
Naaghat ang mga tanod sa paggukod ug naapsan ang mga suspek.
Nakuha gikan sa mga dinakpan ang duha ka pakete sa shabu ug mga drug paraphernalia.
Laing nadakpan mao si Emmanuel Gurosin, 31, taga Cabancalan 1, dakbayan sa Mandaue.
Si Senior Police Officer 3 Antonio Discarten sa Presinto 4 sa MCPO niingon nga ilang nasakmit ang tulo ka pakete’ng shabu ug mga drug paraphernalia.
Dugang duha pa ka pakete’ng shabu ang nasakmit kang Gurosin dihang gihimo nila ang pagrekisa sa kalawasan niini. – /GMR) (BANAT NEWS)