Davide nanghinaut lagda sa ESA usbon

CEBU, Philippines - Nanghinaut si Gob. Hilario Davide III nga susihon og balik sa Department of Social Welfare and Development (DSWD) ang lagda sa pagpanghatag sa emergency shelter assistance (ESA).

Kini nunot sa pagpanagana sa ubang mayor sa pagdawat sa pundo aron mapangapod-apod na sa mga biktima sa bagyong Yolanda.

Usa sa nakapaluya sa mga mayor mao ang lagda nga kadtong nagsweldo og P15 mil pataas dili pahatagan sa hinabang.

Matud ni Davide nga bation og kasagmuyo ang ubang mga biktima sa bagyo ilabi na nga ang ilang pangalan naapil sa listahan sa mga makabenepisyo.

Dugang ni Davide nga posibleng magkagubot na hinuon tungod kay ang maong mga pamilya naglaum nga makadawat og hinabang.

Bisan sa mga kontrobersiya, si Daanbantayan Mayor Augusto Corro nikuha sa ilang ESA sa DSWD.

Apan ang ubang mga mayor wala mokuha tungod sa kabalaka nga makasohan tungod sa lagda sa DSWD.  (BANAT NEWS)