CEBU, Philippines - Nasikop sa gihimong entrapment operation sa Parian Police ang usa ka 35-anyos nga lalaki nga mi-post sa social networking site sa hubo nga hulagway sa 17- anyos nga babaye human kini mibalibad makigkuyog kaniya sa motel.
Grabe ang gibating kaulaw sa batan-ong tinun-an sa usa ka public high school human niya nakita ang iyang hulagway nga hubo ug duna pay hulagway sa pribadong bahin sa iyang lawas.
Tungod niini midangop kini ug ang iyang inahan sa Pari-an Police Station aron moreklamo.
Ang kapolisan mihimo dayon og entrapment operation batok sa suspek nga padayong nanghulga sa biktima nga daghan pa kining i-post nga susamang hulagway kun dili kini mosugot nga mokuyog kaniya og balik sa motel.
Gituohan nga ang maong mga hulagway nakuha sa suspek sa una nilang panag-uban sa motel.
Ang nadakpan sa entrapment operation mao si Jimmy Dindin Lao, lumad nga taga dakbayan sa Danao apan temporaryo nga nagpuyo sa Sambag 2 ug usa ka kanhi guwardiya.
Matud pa ni Police Officer 1 Ivy Omayao sa Women’s and Children Protection Desk sa Parian Police Station nga nahinabi sa Banat News nagkauban ang duha sa motel niadtong bulan sa Nobiyembre nakalabay nga tuig.
“Kanang suspek sige pa og kontak sa biktima requesting for another sex in return for money ug dili kuno makig ana ang biktima ‘niya, iya pa daw pun-an ang gi-upload niya nga picture,” matud pa ni Omayao.
Diha sa motel nakabantay ang suspek nga dunay naniid nilang duha sa biktima maong misuway kini og eskapo apan nadakpan.
Si Lao nga gikuhaan og pamahayag sa Banat News wala moangkon kun kinsay mi-upload sa mga hulagway, apan siya miingon nga bisan asa lang niya mabiyaan iyang cellphone ug wala siya masayod kinsay nagpatik niini sa internet.
Giangkon niya nga nihatag siya kaniadto og P1,000 sa biktima apan tabang kadto kay nagkinahanglan kini og kwarta. Wala hinuon siya mitubag kun pakighilawas ba ang baylo niini.
Sumala pa sa mga polis pito ka hubo nga hulagway nga gibutangan pa g’yud og pangalan sa biktima ang gi-upload sa suspek sa Facebook.
Kasong rape in relation to child abuse ang atubangon sa suspetsado. (Jojo C. Ugdo/EIM)(BANAT NEWS)