CEBU, Philippines - Human sa taud-taod nga pagpaniid nasakpan sa usa ka sakop sa Special Weapons and Tactics sa Mandaue City Police Office ang iyang asawang maestra nga duna diay kaubang lalaki nga usa ‘sab ka maestro diha sa ilang balay.
Nasakpan ang duha sa sulod mismo sa ilang lawak nga giingong nagdulog pasado alas-11 sa miaging gabii sa balay nilang magtiayon sa Poblacion lungsod sa Liloan.
Ang Banat News mitago sa mga pangalan sa mga hingtungdan tungod sa upat ka mga anak sa magtiayon. Ang duha parehong nagtudlo sa duha ka public elementary schools sa dakbayan sa Mandaue.
Daan nang nagduda ang bana nga polis nga dunay laing lalaki ang iyang 31-anyos nga asawa.
Matud pa ni Senior Police Office 4 Octavio Dela Paz ang desk officer sa Liloan Police nga nahinabi sa Banat News nakadawat og impormasyon gikan sa ilang mga silingan ang bana nga dunay laing lalaki iyang asawa ug anha na kini magkatulgan sa ilang balay.
Ang magtiayon wala na mag-uban og puyo sud na sa duha ka tuig.
Gumikan sa kasuko sa bana, nasukmagan niini ang lalaki hinungdan nga kini nakaangkon og bun-og sa iyang nawong.
Matud pa sa hepe sa Liloan Police nga si Senior Inspector Ramil Morpos nga nga nahinabi sa Banat News wa motingog ang lalaki sa pangutana kung duna ba sila’y relasyon sa babaye.
Apan gipasabot ni Morpos nga ilang nakuha ang cellphone sa asawa sa polis ug duna’y mga mensahe sa text ang iyang nakuha nga magtumbok nga posibling duna’y relasyon ang duha lakip na sa mga nakuha nga hulagway.
Kagahapon sa hapon gipasaka na sa piskaliya ang kasong adultery batok sa duha nga kasamtangang gitanggong sa karsel sa Liloan Police. (Jojo C. Ugdol/EIM)(BANAT NEWS)