CEBU, Philippines - Duha ka bata ang patay samtang usa ‘sab ang naangol sa managlahing aksidente sa kadalanan.
Napasok ang usa ka Sports Utility Vehicle (SUV) sa usa ka gi-parking nga cargo truck daplin sa National Highway sa Barangay Dakit dakbayan sa Bogo.
Ang drayber sa Ford Everest naila nga si Marianne Arman, 32, nga taga Poblacion Medellin nga nalandig sa tambalanan samtang patay ang kauban niini nga kaliwat sa iyang bana nga si Carmela Abayon, 16, taga Luyang, Carmen.
Ang drayber sa truck nga si Robert Abella, 38, gitanggong na karon sa kapolisan.
Sa imbestigasyon nga gihimo sa Bogo City Police nga gipangulohan ni Senior Police Officer 1 Alexis Villacrusis nagkaaberya ang maong trak mao nga giayo kini sa daplin sa dalan. Giingong nagbutang usab og “early warning device” ang drayber ug makabantay ang ubang motorista nga dunay nakaparking nga sakyanan.
Apan nabanggaan gihapon kini sa SUV kay matud pa nakatagpilaw ang drayber niini.
Daling gidala sa Bogo Provincial Hospital ang duha ka sakay sa SUV apan nakabsan sa iyang kinabuhi ang dalagita.
Samtang patay usab ang usa ka John Carl Capuno Capuyan, 12- anyos nga batang lalaki human nadasmagan og pickup sa paglabang niini sa dalan sa Barangay Guinsay, Dakbayan sa Danao.
Si Senior Police Officer 1 Reynante Manulat nagkanayon usa ka Rezel Delfin Tumulak, 45, taga dalan B. Aranas sa Duljo Fatima, dakbayan sa Sugbo ang nakadasmag sa bata samtang kini nagdagan pabalik sa Cebu City.
Patay na pag-abot sa Danao Provincial Hospital ang biktima. (BANAT NEWS)