CEBU, Philippines - Gikumpirmar ni Police Senior Superintendent Armando Radoc, office-in-charge sa Lapu-Lapu City Police Office nga adunay lahugay nga mahitabo sulod sa iyahang sakop.
Mao kini ang resulta sa meeting tali kaniya ug ni Mayor Paz Radaza sa miaging Miyerkules sa hapon.
Subay sa patakaran kinahanglang ibalhin og laing pwesto ang usa ka polis pag-abot og duha ka tuig sa usa ka lugar, apan tungod sa mando sa mayor ibalhin og laing pwesto bisan wala pa silay duha ka tuig.
Matud pa ni Radoc nga kinahanglan pa niyang tun-an og maayo kun si kinsa sa iyang mga sakop ang ilahugay gikan sa lima ka police stations.
Tungod sa kakuwang og police personnel , gigamit sa LCPO ang mga tourist police nga unta lahi sila og trabaho. Matud niya kun dunay activation orders gikan sa Camp Crame mahimo na silang makapangayo og dugang sakop.
Una nang girelibohan tungod sa gihulagway sa mayor nga dili maayo og performance mao ang hepe sa City Intelligence Branch nga si Police Senior Inspector Rogelio Pineda Jr. (BANAT NEWS)