CEBU, Philippines - Mga polis sa Fuente Osmeña Police Station sa Cebu City Police Office lakip na ang lima ka policewomen nagpaupaw aron ipakita ang ilang pagsimpatiya sa 44 ka mga sakop sa PNP-Special Action Force sa Philippine National Police nga napatay sa engkwentro sa Tokanalipao, Mamasapano probinsiya sa Maguindanao.
Si Police Officer 2 Sheryl Guanco usa lang sa 76 ka mga polis sa maong buhatan kauban ang ilang hepe nga si Chief Inspector Wildemar Tiu nga nagpaupaw.
Nadestino sa Women’s and Children’s Protection Desk sa Fuente Police si PO2 Guanco, gawas kaniya duna pay laing lima ka mga babayeng polis ang nagpaupaw.
Kagahapon sa buntag 40 ka mga polis ang unang nagpaupaw apan misunod pa ang ilang mga kauban ug hangtod naghapon nagpadayon ang pagpaupaw sa mga polis.
Bisan diyutay wala magmahay si Guanco kay matud niya motubo pa ang iyang buhok. Ang ilang hepe nga si Tiu kinsa kanhi sakop sa SAF miawhag sa ubang mga polis nga mosunod sa ilang gibuhat.
“It has been a part of the SAF trooper tradition that if the director of SAF cuts his hair down the line, we will also do the same. That’s how strong the solidarity, camaraderie and unity of PNP SAF is,” saysay pa ni Tiu kinsa midugang nga simbolo kini sa pagpangita sa hustisya. (BANAT NEWS)