CEBU, Philippines - Bisan sa gisul-ob nga bullet proof vest, patay gihapon ang usa ka gidudahang level 2 drug pusher human gikatahong nakigpinusilay sa kapulisan sa dakbayan sa Danao diha sa F. Ralota Street sa Barangay Poblacion.
Ang namatay naila nga si Rey Piamonte, 36, taga Tuburan Sur, Danao City nga nakaangkon og samad pinusilan sa dughan ug sa iyang apapangig.
Matud pa sa hepe sa Danao City Police nga si Superintendent Elmer Lim nga nahinabi sa Banat News, gawas sa pagpamaligya og drugas naila ‘sab sa lugar nga usa ka badlongon si Piamonte ug gani suspek kini sa mga pagpamusil sa maong dapit.
Sumala pa ni Lim nga katulo na nila nga gisuwayan og sikop si Piamonte apan pirme kining makasibat.
Apan niadtong nakalabay nga kadlawon usa ka tawag ang gikan sa usa ka concerned citizen nga nagpahibalo kanila nga duna’y nasigpatan nga usa ka armadong tawo ang nagbarog sa maong lugar.
Sa pagresponde sa mga polis ilang gisita ang suspetsado apan kalit kining mibunot og armas ug namusil sa mga polis hinungdan nga gibawsan kini, swerteng wala’y naigo sa mga polis apan nahay-ad human sa sinukliay sa bala si Piamonte.
Matud pa nga sa unang pagkaigo sa lawas sa suspek natumba kini apan mibangon og balik ug padayong nakigpinusilay hinungdan nga giusban hangtud nga naigo ang parte sa iyang lawas nga wa matabuni sa bullet proof vest ug duna say bala nga nakalapos niini.
“Andam g’yud ni makigduwelo namo kay naka bullet proof vest man g’yud siya. Nangandam na ‘ni siya kay kapila na gud ni siya gisuwayan namo og dakop,” matud pa ni Lim.
Dali kining gidala sa mga polis sa tambalanan apan nakabsan kini sa iyang kinabuhi.
Nasikop ‘sab ang duha ka lalaki nga sila si Lee Rota, 33, ug Niño Sabalande, 26, taga Cogon,Danao nga kauban ni Piamonte human nakuhaan og tagsa ka paketeng shabu.
Nagduda si Lim nga namaligya og drugas ang suspek sa lugar tungod kay nakakuha sila sa iyang lawas og usa ka medium size nga shabu.
Nakuha sab sa kapulisan ang usa ka .38 revolver nga duna’y duha ka bala ug duha ka basiyo. (BANAT NEWS)