Bala gisawo sa amahan, anak naluwas

CEBU, Philippines - Gisawo sa amahan ang mga bala sa armas nga nitusak sa iyang lawas apan naluwas ang 16-anyos nga anak sa pagpamusil sa barangay Bout, dakbayan sa Sugbo.

Giisip sa batan-on nga ikaduha na niya’ng kinabuhi human naluwas sa kaduha ka pagpamusil sa suspek nga si Renato Cabradilla nga iya’ng uyoan samtang wala nakabuto ang armas.

Atol sa pagpamusil ni Cabradilla sa laing duha ka tawo, dali nga nanuktok ang batan-on sa balay sa apohan diin didto sab sa sulod ang iyang amahan, lola ug mga manghud.

Apan iyang nakita nga diha ra sa iyang kilid ang suspek nga niti-on ug nikablit sa iyang revolver duha ka higayun apan wala nibuto.

Saysay sa batan-on samtang didto na sila sulod sa balay, pugsano’ng giguba sa suspek ang pultahan hinungdan nga una’ng niatubang ang ilang amahan ug gipusil.

Bisan nagkadugo na ang amahan, nahimo pa niini ang pagpadaplin sa mga anak ug sa diha’ng ang batan-on na sad unta ang pusilon, kalit lang nibabag ang amahan ug subli nga naigo sa bala nga nilapos ug niigo sa kilid sa iyang tiyan.

“Nakita nako sir gi-unsa pagsalo sa akong papa ang mga bala nga para unta nako ug sa mga manghud nako,” asoy sa batan-on samtang nipatulo sa iyang luha.

Human sa pagpamusil ug nahutdan na og bala ang suspek dali kini nga nidagan palayo. “Nakabantay ko sir naa’y nihadyong nga bala sa ulo nako, abi nako og patay nako, nisalig na lang ko sa Ginoo,” sumala pa sa batan-on.

Iyang gipadayag nga makapasaylo siya sa suspek nga iyang paryente apan mangayo siya og hustisya sa kamatayun sa iyang amahan.

Tinguha karon sa batan-on nga matuman ang damgo sa iyang amahan nga mahimo siya’ng polis.

Ang inahan labandera ug mag-uuma ang amahan apan nakapatungha kini sa laing duha ka anak sa kolehiyo nga pulos scholar. Ang suspek nagmahay na sa hitabo sukwahi sa una’ng pamahayag.

“Nagmahay ko sir, pero unsaon nahitabo na man na, dawaton nako ang tanan ug unsa ang kaso nako, ang ako lang dili i-apil og priso ang manghud nako kay wala ni labot, ako ra ang nagpatay sa tulo wala’y labot ang manghud nako,” matud ni Cabradilla. (BANAT NEWS)