CEBU, Philippines - Nagkaanam og kadako ang problema sa dakbayan sa Sugbo sa pagpangolekta niini og basura gumikan sa pagsira sa Inayawan Sanitary Landfill sugod niadtong bulan sa Enero ning tuiga.
Si Cebu City Councilor Gerardo Carillo namahayag niini sa iyahang privilege speech sa konseho kagahapon ug miingon nga daghan siyang naagiang mga nagtipun-og nga basura sa kadalanan.
Dugang pa niya nga mao kini ang hinungdan nga makabara sa mga kanal nga moresulta sa pagbaha kun moulan. Base sa iyang paglibotlibot, sagad sa tubag sa mga taga barangay mao nga wala sila makapangandam sa kalit nga pagsirado sa Inayawan Sanitary Landfill, samtang mireklamo usab ang uban nga lisod ang agianan sa labayanan sa Consolacion dumpsite. Gawas pa niana, daghang garbage trucks sa mga barangay ug sa siyudad nga wala magamit tungod kay guba.
Samtang gibutyag ni Carillo, nga tungod sa maong problema, dunay mga grupo nga nagpabayad aron maoy mangolekta og basura sa mga establisamento ug gusto niya kining paimbestigahan sa konseho. Apan ang Paglaum Basurero 20/20, nga gipangulohan ni Francis Paragas nga sakop sa Solid Waste Management Board miklaro sa pakighinabi sa The Freeman, igsuong pamantalaan sa Banat News, nga igo ra silang nitabang sa siyudad aron mahakot ang mga basura.
Matud pa niya, dihang abli pa ang Inayawan dumpsite libre lang ang ilang pagpangolekta kay duna man silay makuha sa pag-segregate ug ma-recycle nga pwedeng mabaligya.
Apan human gisiradohan ang Inayawan, gikinahanglan na nilang mangolekta og bayad nga tag P400 matag establisamento tungod kay bayaran man ang trak, drayber, loaders nga mohakot niini padung sa Consolacion landfill. (BANAT NEWS)