Daghang malnourished sa Cebu City

CEBU, Philippines - Gibutyag ni Cebu City Councilor Alvin Dizon sa iyahang privilege speech naalarma siya sa balita sa igsuong pamantalaan sa Banat News nga The Freeman nga nag-ingong nagkadaghan ang mga batang malnourished sa dakbayan. Gikwestyon karon ni Dizon kun nganong nahitabo kini nga unta dako man ang budget nga gigahin alang sa feeding program alang sa mga bata nga malnourished.

Gustong ipatawag ni Dizon ang mga sakop sa Accelerated Social Amelioration Program kon ASAP aron pangutan-on kun unsay nahitabo sa pundo nga unta sila man maoy gitahasan nga mopahigayon og feeding program ug uban pang programa pagsulbad sa problema sa malnutrition.

Sigon pa sa maong report, ang Cebu City maoy dunay labing daghan nga malnourished sa Central Visayas.

Ang siyudad migahin og budget sa mga sakyanan nagkantidad og P500 milyones alang sa pagpamalit og sakyanan sa niaging tuig apan ang budget karung tuiga alang sa mga gatas sa bata nga ubos og timbang ug malnourished P500 mil lang.

"We should review and evaluate to our individual priorities," awhag pa ni Dizon. "Ang kaugmaon sa atong Dakbayan atong makita kun unsa nato pag-amuma atong mga kabataan," dugang pa niini. (BANAT NEWS)