CEBU, Philippines – Nidangop sa Fuente Police Station ang usa ka Malaysian human nabiktima sa pagpanguot sulod sa usa ka imnanan sa may Mango Square, pasado alas 10 sa nakalabay nga gabii.
Ang biktima naila nga si Judy Pereira, 55, giingong usa ka polis sa Malaysia ug kasamtangan nga nagpuyo sa usa ka hotel sa may Gil Garcia Street, dakbayan sa Sugbo.
Sumala pa sa biktima nga samtang paingon unta mobayad sa cashier sulod sa restobar kalit lang siya gitapok-an sa mga babaye nga miparayeg kaniya ug gusto nga mouban sa iyaha.
Apan sa iyang pagbalibad ug nanglakaw na ang mga babaye nahanaw ang iyang pitaka nga duna’y sulod nga P10,000; $200 ug drivers license sa Malaysia.
Matud sa hepe sa Fuente Police nga si Chief Insp. Wildemar Tiu nga dili pa sila makakompirmar nga usa ka polis ang biktima human kini nideklara nga apil sa nawala ang iyang Police ID, nga gikatahong duna’y ranggo nga Superintendent.
Sumala pa ni Tiu nga ila imbestigaron og tarung ang tanan nga hitabo aron dili sila magamit sa mga langyaw.
Iyang gipasabot nga duna’y uban mangayo lang og police report aron makakuha sa ilang insurance.
“Usahay butangan naku og ‘not valid for insurance claim’ especially kung dili pa namo ma-establish kung tinuod ba gyud ang hitabo,” matud ni Tiu.
Sa maong kaso sa Malaysian, nagtuo si Tiu nga tinuod ang pasangil human nga dali kini nga nitaho sa ilang buhatan. – /GMR) (BANAT NEWS)