CEBU, Philippines - Nakigtagbo si Talisay City Johnny De los Reyes ug mga department heads sa mga sakop sa hunta probinsiyal sa Sugbo may labot sa paglaslas sa konseho sa gipasar nga 2015 budget.
Una na nga nidangop si De los Reyes sa buhatan ni Bokal Grecilda Sanchez sa niaging semana apan nibalik siya kagahapon kauban ang mga department heads.
Matud niya nga full-force na gyud ang iyang pag-adto gumikan kay dili lang siya ang naproblema sa gilaslasan nga budget apan ang iya sab mga sakop ug ang katawhan sa iyang dakbayan.
Si Edgar Mabunay, City Budget Officer, nagkanayun nga mokabat sa katunga sa iyang giduso nga budget ang gilaslas sa konseho.
"Hapit tanang department ilang gipanglaslasan except sa legislative wala nila laslasi, not even a centavo," matud ni Mabunay.
Andam hinuon si De los Reyes nga makig-atubang sa mga sakop sa konseho sa Talisay alang sa kasulbaran sa maong problema. (BANAT NEWS)