CEBU, Philippines - Patay ang usa ka 39-anyos nga lalaki human gipusil sa wala pa mailhi’ng gunman samtang naglingkod ang biktima sa kilid sa gutter sa Greyhound Subdivision sa Barangay Pardo niadto’ng Domingo sa gabii.
Ang gipatay mao si Harold Siton, ulitawo ug nagpuyo sa maong lugar. Matud ni PO1 John Erick Samosa sa homicide section sa Cebu City Police Office nga posible’ng nadudahan ang biktima nga maoy manglungkab sa maong lugar.
Sumala pa ni PO1 Samosa nga sa nakalabay nga mga adlaw daghan ang mga balay nga gipang- lungkab sa maong dapit.
Ang pamilya sa biktima miingon nga wala gayud nalambigit og binuang ang biktima kay dugay na kini nga anaa lang sa sulod sa ilang balay human gi-rehab tungod problema sa drugas. (BANAT NEWS)