Ilong sa minatay gikitkit sa ilaga

CEBU, Philippines - Usa ka minatay nga gipahiluna sa temporaryo nga morgue sa Cebu City Medical Center (CCMC) gikataho nga nawagtangan sa iyang ilong kay gituohan nga gitabangan kini og kitkit sa ilaga.

Giimbestigahan pa kini karon sa kadagkoan sa tambalanan kun ngano nga nakasulod man ang mga ilaga sa cadaver’s holding area nga pinaagi lang sa container vans.

Matud ni Atty. Rey Cris Panugaling, director for administration sa CCMC, nga unom ka trabahante ang gipaubos sa imbestigasyon aron molutaw ang kamatuoran ngano nga kini nahitabo.

Wala gibaliwala ni Panugaling nga tinuod nga ilaga maoy mikitkit sa ilong sa minatay, apan dugang niya nga mao kini ang una’ng kaso sa hospital.

Si Golddy Amor Siton, igsuon sa namatay, miingon nga nakugang sila pagkakita nga wala na’y ilong ang namatay niya nga igsuon nga si Harold Siton.

Matud ni Golddy nga dako siya’g pagtuo nga gikitkit kini sa ilaga tungod pag-abli nila sa pultahan sa morgue adunay upat ka dagko’ng ilaga nga naglumba sa pagpanagan.

Nagkaestorya na ang pamilya sa patay’ng lawas ug ang kadagkoan sa CCMC aron mahibaw-an kun unsa g’yud ang tinuod nga nahitabo sa ilong sa namatay.

Matud ni Atty. Panugaling nga sirado ang container van nga gibutangan sa patay’ng lawas ni Harold nga namatay human mapusili didto sa Barangay Pardo. (BANAT NEWS)