Buang gilugos

CEBU, Philippines - Babaye nga gituohang adunay diperensya sa pangisip gilugos sa 33-anyos nga lalaki sa miagi’ng Domingo sa gabii didto sa kasagbotan sa Barangay Basak, dakbayan sa Lapu-Lapu.

Si Senior Inspector Juan Capacio, hepe sa Lapu-Lapu City Police Office (LCPO) Station-4, nagkanayon nga ang babaye gibana-bana nga kapin sa 20-anyos pa ang pangedaron ug taga Cordova.

Ang maong babaye sagad makit-an nga maglaruy-laroy sa dalan sa Tamiya nga sakop sa Sitio Ibabao sa Barangay, Basak. Ang suspetsado paglugos sa biktima mao si Achilles Ababon, minyo ug lumad nga taga Dinagat Island, Surigao Del Norte ug trabahante sa usa ka kompanya sa Mactan Export Processing Zone 2. Base sa pasiuna nga imbestigasyon, nataymingan ni Ababon ang babaye nga nag-estambay pasado alas utso sa gabii sa mingaw nga dapit sa maong barangay.

Gituohan nga nakombinsir ni Ababon ang babaye nga mokuyog kaniya sa ngitngit nga bahin sa maong dapit ug didto iyang gipahimudsan.

Samtang giromansa ni Ababon ang babaye, usa ka lalaki nga lumolupyo sa maong barangay ang nakasakop kanila ug mibadlong sa suspetsado.

Usa ka polis nga si PO1 Jason de Guzman kalit nga miabot ug gidakop si Ababon ug gidala kini apil ang babaye sa Basak Police Station. Matud ni PO2 Raquel Cosim sa Women and Child Protection desk nga gitugyan nila sa Department of Social Welfare and Development (DSWD) ang babaye aron mahimoan og pakisusi ang pagpanglugos.  (BANAT NEWS)