Youth naglaum Pope Francis motambong sa IEC
CEBU, Philippines - Nagtinguha ang mga tigpasiugda sa International Eucharistic Congress (IEC) Youth Night sunod tuig nga maka-uban gyud si Pope Francis sa kalihukan.
Nakigtagbo ang executive secretary sa Episcopal Commission on Youth, Fr. Conegundo Garganta, sa director sa Commission on Youth sa Archdiocese of Cebu, Fr. Kit Sestoso ug iyang kaabag nga si Fr. Mark Barneso aron pag-umol sa plano sa IEC Youth Day.
“Maayo ra kaayo ang meeting ug naporma na ang activity for the IEC Youth Day,” matud ni Marlito Cabigas, youth leader, Cebu Diocesan Youth Coordinating Council, ug gidasonan sab ni Edna Mae Arellano, secretary sa CDYCC.
Ang tema sa kalihukan mao ang, “Christ in youth, our hope of glory,” nga gipasubay ra sab sa tema sa IEC aron pupareho ra ang kalihukan apan ipahaum sa panginahanglan sa mga batan-on.
Ang overnight nga kalihukan magsugod sa Enero 28 hangtud sa 29 sunod tuig nga manukad sa Hoops Dome, sa dakbayan sa Lapu-Lapu ug molabang sa Plaza Independencia sa dakbayan sa Sugbo.
Gipaabot nga kapin sa 5,000 ka national ug local pilgrims ang motambong sa kalihukan ug wala pa’y labot sa international pilgrims. Ang global media evangelizer, Fr. Robert Baron, ang kompirmadong mohatag sa katesismo sa tema sa maong youth day. (BANAT NEWS)
- Latest
