Gasolinahan gitulis sa nag-helmet

CEBU, Philippines – Usa ka gasoline station nga nahimutang sa Barangay Yati, Consolacion gitulis sa duha ka wala hiilhi’ng tulisan nga nagpatuo nga kustomer kaniadto’ng Lunes sa kaadlawon.

Matud ni PO3 Arthur Ariate nga ang cashier sa gasoline station nga si Jofel Tagsip, nga taga lungsod sa Cordova, gitionan og armas sa mga tulisan.

Si PO3 Ariate miingon nga gitayming g’yud sa duha ka tulisan nga nagkape ang pump boy kauban sa guwardiya diha’ng kalit lang sila nga miabot ug mideklarar og pagpanulis.

Lakip ang guwardiya gitionan og armas ug gikuha ang iyang cellphone dayon gipangayo ang halin sa kahera apan kay nahipos na man ang dako’ng kantidad ang mga sinsiyo na lang maoy nasakiyo sa mga tulisan nga mikabat og usa ka libo ka pesos.

Pulos nagsul-ob og close-type helmet ang duha ka tulisan nga nakuhaan og footage sa Close Circuit Television (CCTV) camera apan dili mailhan ang ilang panagway.

Matud sa polis nga gisuginlan sila sa kahera nga ang mga tulisan dali nga mipabulhot pagpadagan paingon sa dakbayan sa Mandaue. – /RUB) (BANAT NEWS)