Sikyu nisukol sa tulisan patay

CEBU, Philippines – Patay ang usa ka tawo nga nisuway pagsukol sa duha ka tulisan hinungdan nga gipusil sa sitio Fatima, barangay Jubay, lungsod sa Liloan ala una pasado sa niaging kadlawon apan nadakpan ang usa sa mga suspek sa follow-up operation sa kapolisan.

Si Senior Police Officer 1 Bryan Batiquen sa Liloan Police Station niila sa namatay nga si Delo Wagas Mendez, 42-anyos, minyo nga security guard sa TESDA sa dakbayan sa Sugbo ug nagpuyo sa maong dapit.

Matud ni Batiquen nga ilang nadakpan ang kauban sa nagpusil nga si Charles Bryan Carpiso Pitogo, 27, taga Bag-ong Dan, barangay Yati, Liloan.

Dugang ni Batiquen nga sa wala pa mahitabo ang pagpamusil, kauban sa biktima si Ricardo Algoso Oliva, 28, nga taga Fatima, Jubay, dihang kalit lang sila giduol sa duha ka lalaki nga nideklarar og tulis apan dali kini nila’ng gipatiran ug nakahigayun sila sa pagpanagan. Gigukod sila sa duha ka tulisan nga nag-motorsiklo nga ang drayber positibo nga giila ni Oliva nga si Pitogo nga nadakpan.

Dali unta’ng gidala sa Liloan Health Center ang biktima apan ang doktor nga nag-atiman nideklarar nga dead on arrival. – /GMR) (BANAT NEWS)