Japan mikondenar pagpunggot sa Japanese hostage
CEBU, Philippines - Kusganong gikondenar sa Japan pinangulohan sa ilang Primero Ministro nga si Shinzo Abe ang pagpatay sa usa ka Japanese hostage sa mga Islamic State militants ug mihulagway niini nga "outrageous and unforgivable."
Midemanda si Abe nga pabuhian ang ikaduhang Japanese hostage nga freelance journalist nga si Kenji Goto kinsa pabiling anaa sa mga kamot sa ISIS.
Niadtong nakalabay’ng adlaw, gipunggotan og ulo sa ISIS ang self-employed security contractor nga si Haruna Yukawa nga gi-post sa video.
Ang maong pagpatay nakapasuko og maayo sa lider sa Japan kansang gobiyerno nagmagahi pakig-negotiate sa mga terorista base sa ilang palisiya.
"Such an act of terrorism is outrageous and unforgivable," matud pang Abe sa NHK.
Ang amahan ni Yukawa nga si Shoichi sa pamahayag niini sa mga tigbalita dili kadawat sa gidangatan sa iyang anak ug nangindahay nga dili tinuod ang maong balita.
Ang ISIS midemanda og $200 milyones alang sa kagawasan sa duha ka Japanese hostages, apan human gipunggotan si Yukawa, giusab sa ISIS ang ilang demanda ug gusto nilang pabuhian ang babayeng jihadist nga si Sajida al-Rishawi.
Si al-Rishawi usa ka Iraqi nga nasetensyahan og bitay sa nasud sa Jordan tungod sa kalambigitan niini sa pagpamomba sa Amman niadtong 2005 nga nakapatay og 60 ka tawo. (BANAT NEWS)
- Latest
