Kandingan sa probinsiya palambuon
CEBU, Philippines - Gipalig-on sa kagamhanan sa probinsiya sa Sugbo ang pagpamuhi og kanding.
Ang Provincial Veterinary Office nipahigayun og “Small Ruminant Production and Health Seminar” tumong sa pagpalambo sa kaalam ug kapasidad sa mga mag-uuma sa pag-atiman sa kahayupan sama sa kanding.
Sa maong seminar gitudloan sila kabahin sa health management, disease prevention and control lakip na ang herbal medicine, ethno-veterinary practices ug organic goat farming.
Si Gob. Hilario Davide III niawhag sa mga mag-uuma nga pauswagon ang ilang production sa kanding nga sayun kaayo i-manage ug gani pwede lang kining itugway og bata.
Ang seminar gitambungan sa 195 ka mag-uuma, veterinarians ug livestock technicians gikan sa kalungsuran ug dakbayan.
Base sa 2012 nga datos sa Philippine Atlas of Farm Resources, ang probinsiya sa Sugbo ang top producer sa kanding sa Central Visayas diin nikabat sa 231,997 ang backyard ug commercial production. Ang Sugbo mao usab ang top three goat-producer province lukop nasud.
Si Provincial Veterinarian, Dr. Mary Rose Vincoy, nibutyag nga ang Kapitolyo nagpadayun sa ilang goat dispersal program diin ang maong kalihukan gisugdan niadto pa’ng tuig 2008 ug ang livelihood fund sa Department of Energy maoy ilang gigamit sa proyekto. (BANAT NEWS)
- Latest
