Eksperimento sa trapik padayun
CEBU, Philippines - Gipahimangnoan sa Cebu City Traffic Operations Management (CITOM) ang mga motorista ug mga driver sa pangpublikong sakyanan nga bantayan ang mga road modifications sa mga mosunod pa’ng adlaw.
Kini ang gibutyag ni Victor Caindec kinsa executive director sa CITOM.
Sa pagkakaron, ang CITOM nagpatuman og mga road experiments lakip niini ang bag-ong parking scheme sa Fuente Osmeña Circle, flashing lights sa pipila ka eskina, no-left turn sa General Maxilom, ug uban pa. Hinuon, giangkon ni Caindec nga dili kini hingpit makasulbad sa trapiko.
Sigun niya nga ang mga road modifications short term nga solusyon sa pagsulbad sa trapiko sa siyudad ug ang CITOM Board may plano nga irekomendar kang Mayor Michael Rama isip long term nga solusyon. Usa niini ang pagpalapad sa kadalanan.
Matud niya nga wala pa’y road shortage ang siyudad apan angay nga gamiton tanang kadalanan nga dili kaayo maagian og sakyanan.
Padayunon sa CITOM ang pag-ugkat sa mga ordinansa ug balaud sa kadalanan nga gikalimtan na sa mga motorista.
Apil niini ang pag-liberate sa junction box, tungod nakalimtan na sa kadaghanan ang kahulugan sa maong balaud.
Hinuon gibutyag ni Caindec nga adunay mga konsultasyon sa road stakeholders una pa ipatuman ang mga road modifications. (BANAT NEWS)
- Latest
