CEBU, Philippines - Gisaway ni Talisay City Administrator John Yre De los Reyes si Konsehal Danilo Caballero human niduso og resolusyon nga nangayo sa Kapitolyo og hinabang alang sa Talisay City Sports Commission. Si Caballero sa iyang resolusyon nga tukion karong Martes sa konseho nangayo og tag P300,000 kang Gob. Hilario Davide III ug Bise Gob. Agnes Magpale ug tag P200,000 matag-usa kang Bokal Raul Alcoseba ug Julian Daan.
"If the City Council will not slash the budget of the Talisay City Sports Commission, dili na unta na sila sige og pangayo. January pa ta karon unya mangayo na ta'g budget sa Kapitolyo," matud ni De los Reyes sa iyang text message sa Banat News. Si Caballero, kinsa co-chairman sa City Sports Commission, niingon nga dili igo ang ilang gahin sa 2015 alang sa mga programa.
"Si Councilor Caballero niingon nga minimal ang funds sa Sports Commission, unya ngano’ng miapil man siya og paglaslas sa appropriation sa sports commission,” matud ni De lso Reyes.
Si Mayor Johnny De los Reyes nigahin og P4.5 milyones apan gilaslasan sa konseho ang maong pondo ug gibinlan na lang kini og P100,000.
"Naigo ra sila sa ilang kaugalingong paglaslas sa budget unya mangayo dayon," matud ni De los Reyes.
Apan midason si Caballero nga ang financial assistance nga iyang gipangayo lakip na usab sa pagpahigayun og summer workshop ug laing aktibidad nga may kalabutan sa paugnat sa kusog. (BANAT NEWS)