CEBU, Philippines - Nagpatabang si Talisay Mayor Johnny De los Reyes kang Bokal Grecilda Sanchez kabahin sa paglaslas sa 2015 annual budget sa konseho sa dakbayan.
Gihulagway ni De los Reyes nga dili makiangayun ang maong lakang sa konseho ug nipasangil nga dunay bulok politika ang gihimo sa konseho.
“Nalipay mi nga wala mi naigo sa bagyong Ruby, wala mi naigo sa bagyong Seniang apan naigo mi sa bagyong politika,” ni De los Reyes.
Mokabat sa P1.089 bilyones ang kinatibuk-ang giduso nga 2015 annual budget apan P539.941 milyones lang ang giaprobahan sa konseho.
Matud ni De los Reyes nga karong Lunes gikatakdang i-veto niya ang maong paglaslas sa budget.
Ang giaprobahan nga budget moagi pa sa committee on budget and appropriation sa hunta probinsiyal nga gipangulohan ni Sanchez.
Si Sanchez makigtagbo usab sa executive ug legislative sa siyudad aron malingkuran ang ilang problema.
Subay niini, si Bise Mayor Romeo Villarante miingon nga ila nga tan-awon kung asa nga budget ang i-veto sa mayor tungod kay kung dili usab makiangayon, ila kining i-override. Gipasabot ni Villarante nga kung kuwang ang budget pwede sila’ng mopalabang og supplemental budget. (Brenda D. Batuto/GMR)(BANAT NEWS)