CEBU, Philippines - Pormal nang giuswag ang election period sa Sangguniang Kabataan (SK) Elections niining tuiga human aprobahi sa Comelec niadtong Huwebes ang Resolusyon Numero 9928.
Ang nahisgutang resolusyon nag-amendar sa Resolusyon Numero 9905 nga niadtong Enero 22, 2015 magsugod ang election period dungan niini ang pagpatuman sa Comelec gun ban hangtud sa Marso 2, 2015.
Subay sa bag-ong kamandoan, ang election period ug Comelec gun ban magsugod na sa Pebrero 6, 2015 hangtud sa Marso 2, 2015.
Sayo pa niini, si Provincial Commelec Supervisor Lionel Marco Castillano nagkanayon nga panahon sa gun ban ang law enforcement agencies lang ang gitugota’ng makadala og armas ug dili exempted sa maong balaod ang mga sibilyan.
Gipasabot ni Castillano nga kung masuspenso man ang Comelec gun ban dili pasabot nga ma-postpone usab ang eleksiyon gawas kung adunay balaod gikan sa Kongreso ug Senado kabahin niini.
Matud ni Castillano nga ang Comelec dili makabuot-buot sa pag-uswag sa petsa sa eleksiyon diin kinahanglan usab silang magtamod sa balaod.
Gikatakdang karong Pebrero 21, 2015 na ang eleksiyon sa SK. (Brenda D. Batuto/EIM)(BANAT NEWS)