CEBU, Philippines - Pormal na'ng gitak-upan ang Fiesta Senyor nga kasaulogan pinaagi sa "Hubo" o ang pag-ilis sa sapot sa imahe ni Senyor Sto. Niño.
Gisugdan alas-4 sa kaadlawon sulod sa Basilica Minore del Sto. Niño gipanguluhan ni basilica rector Fr. Jonas Mejares ang Santos nga Misa ug ang pag-ilis sa gisul-ob sa imahen sa Balaang Bata.
Sulod sa Misa pagahimoon ang usa ka seremonyas diin hinay-hinay nga tangtangon ang sapot sa Batang Hesus sama sa korona, kapa, scepter.
Human sa pagtangtang niini, ligoon ang hubo nga imahen human hinay-hinay usab kini nga ilisan.
Nanawagan ang sa Bol-anong pari, nga angayang usbon ang naandang pagtoo nga ang maong okasyon panahon sa pangbwenas kay mag-ilog ang mga deboto sa pagkuha sa tubig nga gikaliguan sa imahen.
"Ang hubo dili aron makabaton kita og tubig nga beninditahan gikan sa gikaligo sa Niño kundili, makakita kita og bag-ong kahulugan sa atong pagka binunyagan," matud ni Mejares.
Sama sa naandan nga espesyal nga okasyon sa simbahan, mihalad og usa ka awit si Fr. Mejares nga naila usab nga “singing priest.” Ang iyang gihalad mao ang Tagalog nga awit nga nag-ulohang "Lupa." Human sa pag-ilis sa sapot sa Batang Niño, gihimo ang traditional Sinulog nga sayaw gipanguluhan sa Lumad Basakanon ug sa Sinulog Foundation Incorporated sa Cebu City Government.(Jessa Chrisna Marie Agua/EIM)(BANAT NEWS)