CEBU, Philippines - Duha ka tindahan nga gipasanginlang namaligya og mga expired giembargohan og mga produkto sa mga sakop sa Food and Drug Administration (FDA), National Bureau of Investigation-7 ug Naval Forces Central diha sa dakbayan sa Talisay City kagahapon.
Matud ni FDA Regulation Officer 3 Sarah Oriol nga ang duha ka tindahan nasakpan nila nga namaligya og mga expired goods nga di na luwas kan-on sa tawo.
Ang pag-adto sa FDA kagahapon pinasikad kadto sa “visitorial power” niini.
Ug dihang ilang nakita ang maong mga baligya nga expired, nalumping na ang lata, dili mao ang label, ilaha kining gisakmit.
Sumala pa sa alegasyon ni Oriol nga ilang nasakpan ang mga de lata nga pineapple tidbits, coconut strings, ug expired salted black beans diha sa estante usa ka tindahang nahimutang sa Barangay Biasong.
Matud pang Oriol, kalapasan kini sa Republic Act 9711 o ang balaod nga nagdili sa pagbaligya sa mga daot na nga pagkaon ug tambal.
Ang mga nasakmit nga canned goods gikarga sa M35 truck sa Philippine Navy ug giisyuhan og cease and desist order ang mga tindahan nga dili na mobaligya og mga expired nga produktong pagkaon ug tambal.
Matud ni Assistant Regional Director Dominador Cimafranca nga ang papel sa NBI mao ang seguridad sa lugar.
Si Antonio Bacalso, legal counsel sa usa sa mga tindahan mihimakak nga ang nasakmit nga mga baligya naa sa mga estante.
Matud niya gilain na ang maong expired nga baligya ug gibutang sa storage area samtang gipaabot nila ang distributors nga mokuha niini.
Si Bacalso mikuwestiyon usab sa seizure order ug andam nga motubag sa alegasyon sa FDA nga ‘on display’ ang maong mga gisakmit nga produkto.
Samtang, ang National Food Authority misusi usab sa maong tindahan ug gipadala si Regional Investigator Edgar Diez tungod sa nadawat nilang tawag nga dunay mga sako sa bugas nga nakita sa maong tindahan.
Matud niya nga ilang padad-an og summon ang maong tindahan aron sutaon kun duna ba silay lisensya pagbaligya og bugas ug kun haom pa bang kan-on sa tawo ang ilang baligyang bugas. (Mylen Manto/EIM)(BANAT NEWS)