Backhoe idili na sa quarry

CEBU, Philippines - Idili na sa Kapitolyo ang paggamit og backhoe sa pagpangubkob o quarrying operation sa kasapaan sa probinsiya.

Tumong sa maong lakang ang pagprotektar sa kalikupan.

Gipasar sa hunta probinsiya ang resolusyon ni Bokal Alex Binghay kabahin sa pagdili sa backhoe sa pagpangubkob diha sa kasapaan. Gipasabot ni Binghay nga ang paggamit og backhoe makaguba sa sapa tungod kay dili mapatas ang gilawmon ug modaku ang bukana o baba sa sapa.

Kung maguba ang sapa nagpasabot usab kini nga nahimutang sa kakuyaw ang kinabuhi ug kabtangan sa mga residente sa lugar.

Gisanglitanan ang Sapangdaku River sa dakbayan sa Toledo nga daku na kaayo ang kadaut gumikan sa paggamit og backhoe sa quarry operations. (BANAT NEWS)