CEBU, Philippines - Gibalhug sa detention cell sa kapolisan ang 45-anyos nga babaye nga una’ng gidudahan nga carnapper human niilog og drive sa Toyota SUV nga sakyanan sa Don Andres Soriano Avenue, Tribunal, barangay Centro, dakbayan sa Mandaue alas 12 pasado sa niaging tungang gabii.
Ang maong babaye giila ni PO1 Fredelou Quezon sa Presinto 2 sa Mandaue City Police Office (MCPO) nga si Ma. Milagros Mocrate, taga dakbayan sa Iloilo.
Sa taho ni Chief Inspector Jimmy Aguisandra, desk officer on duty sa MCPO, nga usa ka Eileen Ylaya Almadin, 41-anyos, minyo nga taga barangay Umapad sa maong dakbayan ang nagmaneho sa iyang Toyota Fortuner SUV nga kolor itom nga nagdala sa plate number ZFX 298. Kini gikan sa dakbayan sa Sugbo apan dihang nahidangat sa maong dapit naka-aksidente sa laing sakyanan hinungdan sa pagpahunong niini.
Nigawas si Almadin ug nilakaw padulong sa buhatan sa traffic division sa MCPO nga nahimutang pipila ka metros ang gilay-on sa tuyo nga mangayo og police assistance.
Dugang pa ni Aguisandra sa iyang report nga sa pagbiya ni Almadin wala ma-locked ang pultahan ug nag-ungot ang yawe sanglit didto man sa sulod sa sakyanan ang anak niya’ng babaye ug usa ka pag-umangkon nga lalaki.
Samtang naglakaw, kalit nibanos sa pagsakay si Moncrate ug gipadagan ang sakyanan padulong sa dalan Plaridel hinungdan nga nakasinggit kini sa pagpangayo’g panabang sa duha ka traffic enforcers nga sila si Allan Ruiz Suan ug Ronilo Arandoque Cabasigan hinungdan sa pagkasikop sa suspek. Gitanggong karon ang dinakpan apan matud ni Quezon nga nag-wild ang suspek ug aron dili makamugna og kadaut sa uban nga piniriso maoy ilang gihimo ang pagbutang na lang og pusas niini. (BANAT NEWS)