Nagbugal-bugal sa prosesyon gidakop

CEBU, Philippines – Nagtingkagol sa Fuente Police Station detention cell ang usa ka Amerkano kauban ang iyang asawa ug usa nila ka higala’ng babaye human gipasanginlan nga nibugal-bugal sa mga tawo nga kuyog sa prosesyon sa milabay nga hapon.

Ang nasikop naila nga si Michael Bradley, 46, iyang asawa nga Pinay nga si Elcel Santos Bradley ug ang usa nila ka higala nga si Rebeca Gonzales, taga Bagong Sikat, Puerto Princesa, Palawan.

Matud ni Chief Insp. Wildemar Tiu, hepe sa Fuente Police, nga siya mismo ang mangunay sa pagpasaka og kaso lakip na sa mobarug nga reklamante sa tulo ka dinakpan.

Samtang gihimo ang solemn prosesyon sa imahen sa Sr. Santo Niño, kalit lang nipatingug sa megaphone ug niisa sa dala nga placard ang tulo nga nag-insulto sa kalihukan sa may Osmeña Boulevard.

Si Tiu miingon nga usa sa giluwatan nga pulong sa langyaw nga nagsimba og “idols” ang mga tawo nga trabaho sa demonyo.

Gibadlong sa mga polis ang tulo apan wala nagpatuo hinungdan nga ilang gisikop bisan ni-insister nga duna sila’y katungod sa pagpasibaw sa ilang tawhanong katungod ug sa kagawasan sa relihiyon.

“Dili man gyud sila mopatuo, binuang kaayo to, nag-solemn procession baya to nga time. Kung mo-insist siya sa right to religion sakto man, pero dili na absolute, dili pud to mao ang venue nga magwali sila,” sumala pa ni Tiu. Ang kauban sa langyaw nga si Gonzales miingon nga ilang plano nga sa dalan Colon.

Sa pakighinabi sa Banat News ni Bradley kini misaysay  nga wala kini nagmahay bisan pa man og napriso tungod sa maong hitabo.

Hinoon giangkon sa langyaw nga nakalitan kini sa hitabo nga dinhi pa sa Pilipinas nga usa ka demokratikanhong nasud napriso gumikan sa pagsangyaw sa pulong sa Ginoo.

“It is my first time to get in jail for preaching the word of God, but its okey, this is just a simple challenge,” matud ni Bradley. Gipasabot sa langyaw nga wala sila’y tuyo makapasakit sa tinuohang Katoliko apan wala lang daw natarung og sabot ang iyang mensahe.

Ang langyaw nipahibawo nga sila sakop sa Bible Baptist Church. Kasong paglapas sa Revised Penal Code ang ipasaka batok sa mga dinakpan.

“Testingan nato na’ng balaura kay naa mana sa Revised Penal Code,” dugang ni Tiu. – /GMR) (BANAT NEWS)