BIN padung sa fluvial gipusil patay

CEBU, Philippines – Patay ang usa ka sakop sa Barangay Intelligence Network (BIN) sa   lungsod sa Liloan human gipusil sa armadong mga lalaki nga nagsakay og motorsiklo sa national highway sa barangay Yati.

Ang biktima padulong unta mosaksi sa fluvial procession sa dakbayan sa Mandaue kagahapon sayo sa buntag.

Si Senior Police Officer 1 Bryan Batiquen sa Liloan Police Station miila sa biktima nga si Roger Comar Sasing, 49-anyos, minyo nga taga barangay Poblacion sa maong lungsod ug ang nagpusil nga duha ka wala hiilhing lalaki pulos gagmay og lawas ug nagsul-ob og close type helmet.

Matud ni Batiquen nga nagsakay sa kaugalingong motorsiklo ang biktima ug padulong unta kini sa pagsaksi sa fluvial procession sa dili pa motambong sa iyang trabaho sa dakbayan sa Mandaue.

Dugang ni Batiquen nga gisundan sa mga mamumuno ang biktima gikan sa ilang panimaye.

Dihang nahidangat sa national highway, ang motorsiklo nga nagsunod kalit lang nitupad sa pagpaduol ug ang nag-angkas ang nipusil sa biktima kinsa nalamba sa karsada.

Ang duha nga wala hiilhing lalaki ang dali nga nipabulhot sa pagpadagan pahilayo sa maong dapit ug ang mga tawo na  ang nidala sa biktima sa Menderos Medical Hospital sa lungod sa Consolacion apan gideklarar sa mga doktor nga dead on arrival.

Nakaplagan sa crime scene  ang unom ka kabhang sa armas nga kalibre .45.

Anggulo sa pagkasakop sa BIN sa kapolisan sa lungsod sa Liloan ang usa sa gitan-aw sa kapolisan ingon man ang personal nga gikabangi sa biktima.  (BANAT NEWS)