CEBU, Philippines - Giandaman sa Philippine Coast Guard ang fluvial procession sa imahen sa Senior Santo Niño ug Birhen sa Guadalupe karong adlawa.
Kini nunot sa hulga sa bagyong Amang.
Matud ni PCG-7 Station Commander Rodulfo Villajuan nga ang rota sa fluvial procession gideklarar nga special area diin kung ipaubos ang Sugbo sa bisan unsang signal ug dili kusog ang hangin ug linaw ra ang kadagatan, magpadayun ang kalihukan.
Apan kun dautan gyud ang panahon, si Villajuan niingon nga dili mahimo’ng ibutang sa risgo ang kinabuhi sa mga tawo hinungdan nga makig-alayon sila sa kadagkuan sa Basilica ug fluvial committee aron irekomendar nga dili ihinayun ang fluvial procession.
Ang PCG dunay giandam nga chopper dili lang gamiton alang sa flower dropping lakip na sa ilang aerial survey aron masusi ang sitwasyon sa panahon lakip na ang kadaghan sa mga partisipante.
Human sa cut-off kagahapon, kapin sa 50 ka barko ug motorbanca ang narehistro sa PCG nga moapil sa procession.
Samtang dili malikayan nga dunay mangapil nga wala marehistro, ang PCG niingon nga dili nila did-an apan kinahanglan i-regulate aron malikayan ang disgrasya sa kadagatan.
Matud ni Villajuan nga nag-andam sila og 45 ka floating assets, sama sa rubber boats ug speed boats.
Dugang pa niya nga adunay ma-assign nga Coast Guard martial sa matag usa ka barko. (Decemay P. Padilla ug May Miasco/GMR)(BANAT NEWS)