Naghikog sa lodge wa pa ilhi

CEBU, Philippines - Nagpabilin pa gihapon nga  Mr. X  ang lalaki nga nipaak sa dunggan sa 23-anyos nga boring sulod sa Hidden Lodge sa Guizo, dakbayan sa Mandaue kinsa gituohang naghikog niadtong Miyerkules sa kadlawon.

Si Police Officer 2 David Omambac sa Presinto 1 sa Mandaue City Police Office (MCPO) miingon nga ang namatay kuyog sa 23-anyos nga boring sa pag-check- in bugti sa P300 nga bayad.

Atol sa ilang romansa, giingong gipaak sa lalaki ang dunggan sa babaye kinsa dali nga midagan paingon sa gawas sa kuwarto.

Ang cashier sa Hidden Lodge nga si Analyn Melencion maoy nanawag sa ilang buhatan labot sa reklamo sa babaye nga taga dakbayan sa Lapu-Lapu.

Dihang gisusi ang lawak, maoy nasuta nga gi-locked ug dihang gituktok ang pultahan ug gisangpit ang lalaki apan wala nangabli hinungdan nga gigamitan sa duplicate nga yawe ug mao’y nakita nga nagbitay na sa kisame nga patay na ginamit ang bed sheet nga gihigot sa ilog.

Ang maong lalaki nagsul-ob og short pants nga uniporme sa basketball ug wala’y identification card ug wala’y nakaplagan nga pitaka.

Anaa sa Rolling Hills Memorial Chapel sa barangay Banilad sa maong dakbayan ang patay’ng lawas sa lalaki ug gipaabot ang kabanay nga mo-ila aron ipaubos sa autopsy pagseguro kung wala ba’y foul play sa kamatayon niini.  (BANAT NEWS)