CEBU, Philippines - Usa ka babaye nga wala nay sapot ang napalgang patay sud sa usa ka lawak sa usa ka pension house sa Barangay Day-as ning dakbayan sa Sugbo kagahapon sa buntag.
Hangtod karon wala pa mailhi ang pangalan sa maong babaye nga gibana-bana nga 30 hangtod 40 anyos ang pangidaron, 4”10 ang gitas-on, ang buhok taman sa abaga ug nakaputi og t-shirts, naka pantalon sa dihang kini misulod sa pension house.
Matud pa ni Senior Police Officer 1 Ruth Violango, ang imbestigador sa Homicide Section sa Cebu City Police Office (CCPO) nga nahinabi sa Banat News alas-9 sa gabii Enero 12 mi-check in ang maong babaye kauban ang usa ka lalaki.
Si Emily Abadilla, trabahante sa pension house mibutyag sa kapulisan nga nakadungog kini sa tingog nga naghilak ug daw nangayo og tabang niadtong Enero 13 sa kaadlawon apan dali ra ‘sab nga nahilom.
Pipila ka minutos ang milabay migawas ang lalaki nga kauban sa maong babaye ug wala na mibalik.
Kagahapon sa buntag, subli nilang gisuna ang duha apan nahibulong sila nga mao gihapon ang posisyon sa tiil sa babaye nianang unang ilang gisuna sa miaging adlaw hinungdan nga ilaha na kining gitan-aw ug nakurat sila nga wa kini kinabuhi.
Sa pagsubay sa kapulisan nagkatag ang mga gamit sulod, dunay mga bun-og sa lawas ug dunay mga dugo sa mga sinina ug sa kama. Gidudahang gituok kini gamit ang usa ka sinina. (BANAT NEWS)