CEBU, Philippines - Nalandig sa tambalanan ang gwapa nga 16-anyos nga gikostudiya karon sa social welfare sa probinsya tungod sa mga paglapas niini sa balaod human nga giingong na-overdose sa tambal nga angay ra unta sa adunay sakit nga tuberculosis kon TB.
Matud pa ni Bise Gobernador Agnes Magpale, nga misuway paghikog ang maong gwapang gipasanginlang nangawat sa usa ka boutique, nangilad og beauty parlor ug sa usa ka resort sa miaging tuig.
Si Magpale nakurat sa gibuhat sa maong dalagita gumikan kay aduna may mga social welfare workers sa Department of Social Welfare and Development (DSWD) nga nagbantay niini sa ilang sentro.
Si Bobby Legazpi, Chief Security sa Kapitolyo miingon nga nataligam-an paghipos sa social welfare ang butangan sa maong tambal ug pagkakita sa maong dalagita giyarok niini ang mga tabletas.
Tungod sa pagyarok niya sa maong mga tambal, nalipong ug nagsuka-suka ang dalagita hinungdan nga gitabang ug gidala sa tambalanan.
"According to her she took the medication around 1 pm and then the staff didn't know until around 4-5 p.m. that was the time that she was throwing up," asoy ni Legazpi.
Gipadaplin ni Magpale ang reklamo sa abogado sa dalagita kun nganong wala kini buhii nga unta gimando na man sa korte nga pabuhian human nga misibog ang mga reklamante niini.
"The protocol is, it has to be center to center, she's with the center now and the center will turnover a minor who has a Children In Conflict with the Law (CICL) to the other center which is Sogod, Leyte," pasabot ni Magpale.
Si Magpale nagkanayon nga nagkasabot na sila sa mayor sa Sogod nga si Mayor Lissa Marie Durano nga mag-estorya bahin sa dalagita ug plano unta nga Enero 27 kini ibalhin apan nausab kini tungod sa maong hitabo.
"Her sister was with her pero 18 pa man pud ang edad gud. So, I called her father but her father refused to come ug ni contact me sa iyang aunt pero dili sad modawat niya," tataw ni Magpale.
Matud ni Rose Jao, OIC sa Provincial Social Welfare Development Office (PSWDO) nga sa sunod semana magbuhat sila og resolusyon kabahin sa kustodiya sa dalagita tungod kay walay kabanay nga modawat niini. (BANAT NEWS)