Kaso ni Rama gibasura sa Malacañang

CEBU, Philippines – Gibasura sa Office of the President ang kaso’ng administratiba nga gipasaka ni kanhi konsehal Michael Ralota batok ni Mayor Michael Rama kabahin sa paggasto sa mayor sa P5 milyones nga budget sa Association of Barangay Councils (ABC) sa laing proyekto.

Gihangop pag-ayo ni Rama ang pagbasura sa Malacañang sa gipasaka’ng kaso ni Ralota kay matud niya wala siya makahimo’g graft and corruption bisan og gigasto niya ang ABC funds sa lain nga gastohan.

Ang hukom sa Malacañang pagbasura sa mao nga kaso’ng administratiba nagumikan sa pagkapili pag-usab ni Rama isip mayor sa dakbayan sa Sugbo niadto’ng eleksyon sa 2013.

Ang gitawag og “Aguinaldo Doctrine” nagpasabot nga ang mga opisyal sa kagamhanan dili na mahimo’ng padayonon sa pag-imbestigar sa kaso nga administratiba nga gipasaka kanila kun sila mapili pag-usab sa eleksyon.

Si Ralota maoy presidente kaniadto sa ABC ug alyado sa Bando Osmeña Pundok-Kauswagan (BOPK) nga kontra ni Mayor Rama isip maoy pangulo sa Team Rama. – /RUB) (BANAT NEWS)