Drone pakuhaa’g permit sa CAAP
CEBU, Philippines – Pakuhaon og permit gikan sa Civil Aviation Authority of the Philippines (CAAP) kadtong mogamit og drone panahon sa Sinulog.
Kini ang awhag ni Sinulog Foundation Inc. (SFI) Executive Director Ricky Ballesteros sanglit usa lang ka drone ang ilang gitugutan nga magamit sa Cebu City Sports Center.
Matud ni Ballesteros nga tumong niini ang seguridad tungod kay matud pa dunay uban nga mogamit og drone nga dili kahibawo ug makamugna na hinuon og panic sa katawhan.
Gani gipahibawo ni Konsehal Dave Tumulak nga pagpangandam sa seguridad ang pagbutang nila og dugang 26 ka close circuit television (CCTV) camera labi na sa mga dapit nga dugukan sa daghang tawo.
Matud ni Tumulak nga mopakatap usab sila sa mga fire trucks aron pagseguro nga kun dunay sunog nga mahitabo dali ra nga makaresponde ang kabomberohan.
Gihangyo usab sa kagamhanan ang mga ginikanan nga kun mosuroy panahon sa Sinulog uban sa ilang mga anak seguraduhon nga dunay name tag ang ilang anak aron kun mangawala dali ra nga ma-identify ug ma-contact ang tagtungod.
Samtang gipahibawo ni Ballesteros nga karong Biyernes mahuman na nila ang gihimong preparasyon sa entablado nga maoy sayawan sa mga contingents.
Asoy ni Ballesteros nga seguridad gyud sa mga bata ang ilang gihuna-huna hinuon nakita niini nga mismo ang mga contingents nahibawo na sa ilang buhaton ilabi na sa foot wear aron di na masubli pa ang nahitabo diin dunay mga tiil nga nangapaso tungod sa grabeng kainit. (BANAT NEWS)
- Latest
