CEBU, Philippines – Patay ang 30-anyos nga lalaki human gitigbas samtang padulong pauli sa ilang balay sa sitio Tangke, barangay Basak, dakbayan sa Lapu-Lapu pasado alas 11 sa gabii sa niaging Domingo.
Sigun sa imbestigasyon ni PO3 John Carlo Jocutan sa Lapu-Lapu City Police Office-Homicide Section, ang biktima nga si Marco Laguisma ang gisugat og tigbas gamit ang mahait nga hinagiban ni Glen Labao, 27, ug Archie Solis, 32, kinsa kasamtangang nagpuyo sa mao nga barangay.
Si Labao lumad nga taga lungsod sa Asturias samtang si Solis lumad nga taga Guihulngan, Negros Oriental.
Si Jocutan miingon nga samtang naglakaw padulong uli ang biktima kuyog ang kapuyo nga si Anavilla Galo, 31-anyos nga usa ka therapist, nakabantay ang biktima nga niduol og kalit sa ilang agianan si Labao ug dayun sumbag kaniya.
Nibawos ang biktima hinungdan nga ang kauban nga si Solis ang nikuha og sundang ug nigukod kang Laguisma.
Dihang na-corner ug naabtan ni Solis si Laguisma, iyang gitigbas ang biktima sa makadagha’ng higayun.
Daling miikyas ang duha ka suspek samtang ang biktima kinsa nakaangkon og samad sa tuong bahin nga kamot ug ulo ang daling gidala sa Lapu-Lapu City District Hospital apan gideklarar nga dead on arrival. – /GMR) (BANAT NEWS)