CEBU, Philippines – Patay ang usa ka motorista dihang nalamba ang motorsiklo nga iyang giluwanan sa sementadong karsada sa barangay Polambato, dakbayan sa Bogo alas 10 pasado ang takna sa niaging gabii.
Si SPO3 Oswaldo Layson sa Bogo City Police Station miila sa biktima nga si Jay John Olivar, 24, ulitawo nga taga barangay Argawanon, lungsod sa San Remigio.
Matud ni Layson nga kusog nga nagdagan ang motorsiklo sa biktima gikan sa Polambato Wharf ug kalit lang nabangga sa gutter nga nakaingon sa pagkalamba.
Gumikan sa kusog nga impact sa pagkalamba, ang biktima nalabay sa sementado’ng bahin sa karsada nga nakaingon sa grabeng kadaut nga naangkon sa iyang kalawasan.
Nagtuo si Layson nga kompiyansa lang ang biktima sa pagdala sa iyang motorsiklo nga maoy hinungdan nga wala usab kini mag-helmet sanglit gabii na.
Dali nga gihatud ang biktima sa Bogo Provincial Hospital ug gibalhin sa Vicente Sotto Memorial Medical Center sa dakbayan sa Sugbo apan gideklarar sa mga doktor nga patay na. – /GMR) (BANAT NEWS)