Sinulog sa kabataan nagkanindot

CEBU, Philippines - Ang mga contingents gikan sa Don Vicente Rama Memorial Elementary School ug Apas National High School ang nihari sa Sinulog sa Kabataan sa Dakbayan ritual showdown kagahapon.

Nalangkat sa duha ka eskwelahan ang premyo nga mokabat sa P300,000 human sila nidaug sa elementary ug secondary nga kategorya.

Dugang P50,000 ang nakuha sa matag eskwelahan sa pagdaug sa Best in Costume sa ilang mga kategorya ug laing P30,000 ang naangkon sa Apas NHS isip 2nd placer sa street dancing.

Atubangan sa gibana-banang 25,000 ka nanan-aw, mabulokon ang nahimong performance sa Don Vicente Rama MES nga mipakita sa gahum sa Sr. Sto. Niño pinaagi sa pag-abog sa mga “human ants” kon dagkung hulmigas sa ilang sayaw.

Sa ilang bahin, nipasundayag og usa ka tradisyonal nga Sinulog-based number ang Apas NHS.

Sa elementary category, nakuha ang second place sa contingent gikan sa Mabolo Elementary School nga mao usab ang gideklarar isip Best in Musicality ug Best in Street Dancing. Sa kinatibuk-an, nikabat og P250,000 ang premyo nga nadag-an sa Mabolo contingent.

Mokabat sa P250,000 sab ang tanang daug sa Don Sergio Osmeña Sr. Memorial National High School nga mao’y nakasakmit sa ikaduhang ganti sa secondary category ritual showdown. Sila sab ang nahimong Best in Musicality ug Best in Street Dancing sa ilang kategorya.

Ang ubang mananaug sa elementary division naglangkub sa Cebu City Central School (3rd place alang sa premyo nga P100,000);  Labangon Elementary School (4th place, P75,000); ug Carreta Elementary School (5th place, P50,000).

Ubang mananaog sa secondary level mao ang Abellana National School (3rd place, P100,000); Talamban National High School (4th place, P75,000); ug Pasil Night High School (5th place, P50,000). Ang ubang nakadaog sa street dancing category mao ang Labangon ES (2nd place, P30,000) ug Bulacao ES (3rd place, P20,000) alang sa elementary level ug ang Talamban NHS (3rd place, P20,000) sa secondary level.

Si Ricky Ballesteros, executive director sa Sinulog Foundation Inc., mihulagway nga ni-improve ang performance sa mga contingents karong tuiga labi na sa pagpangita og bag-ong tema sa ilang sayaw, ingon man sa ilang paggamit og props ug paglihok sa entablado.

Karong Domingo gikatakda ang Sinulog Grand Parade diin mas dagkung premyo ang nagpaabot sa mga mananaug sa ritual showdown ug salmutan sa nagkadaiyang mga out-of-town contingents.  (BANAT NEWS)