Amahan ug anak patay sa kabilya
CEBU, Philippines - Patay ang usa ka amahan nga truck boy ug ang iyang 8-anyos nga anak niining babaye samtang tulo ang angol dihang nalimbowad ang gisakyan nila nga dump truck diha sa National Highway sa Barangay Tubod lungsod sa Sibonga.
Ang mga nangamatay mao sila si Eduardo Purisima, 38, ug Ediliza Purisima, 8, nagpuyo sa Magcagong sa maong lungsod.
Samtang ang nangaangol mao sila si Fediliza Labuca, ka-live in partner ni Eduardo Purisima, 45, ug ang magtiayong sila si Dominador Olanda, 57, ug Gregoria Olanda, 57, pulos kawani sa Map Alviola Construction. Samtang ang drayber sa dumptruck giila nga si Isidro Genobaga Jr., nga silingan ra sab sa mga biktima.
Si Police Officer 3 Teofilo Manlanat ang desk officer sa Sibonga Police nga nahinabi sa Banat News gikan sa lungsod sa Minglanilla ang trak ug nagkarga og mga kabilya ug mga puthaw ug paingon unta sa Barangay Manatad sa Sibonga diin dunay gihimo nga eskwelahan sa maong barangay.
Sigun pa ni Manlanat nga paglabay sa maong dump truck sa Poblacion sa maong lungsod nanakay ang mga biktima sa maong dump truck aron mopauli sa ilang barangay nga gikan ‘sab mitambong sa fiesta sa Poblacion. Apan pag- abot sa barangay Tubod kalit lang nalimbuwad ang sakyanan human nga nakaligis og lawom nga libaong sa kalsada.
Ang duha ka mga namatay mao’y natabunan sa mga kabilya ug mga puthaw. Samtang ang tulo ka mga naangol ang nakaangkon lang og mga diyutay nga bun-og sa kalawasan.
“Wala na daw nakabawi ang dump truck pag-agi sa libaong,” matud pa ni Manlanat.
Dali pa unta nga gidala sa usa ka klinika ang amahan ug anak apan nakabsan gayud sila sa ilang kinabuhi. (BANAT NEWS)
- Latest
