CEBU, Philippines - Gipaabot nga karong adlawa ipahibalo ang implimentasyon sa P.50 nga pag-us-os sa pletihan sa mga jeepneys dinhi sa Central Visayas human nga naaprubahan ang petisyon kalabot niini niadtong Huwebes.
Ang chairman mismo sa Land Transportation Franchising and Regulatory Board nga si Winston Gines maoy gipaabot nga moanunsyo niini karong adlawa sa pagduaw niini sa dakbayan sa Sugbo.
Si LTFRB-7 regional director Rey Elnar mibutyag bisan naaprubahan na ang provisional jeepney fare reduction, wala dayon ipahibalo niadtong Huwebes kun kanus-a ang implimentasyon niini.
Kahinumdoman nga si kanhi Cebu City Councilor Augustus "Jun" Pe misang-at og petisyon sa LTFRB-7 niadtong Disyembre sa miaging tuig aron paubsan og P.50 ang minimum nga pletihang P7.50 aron mahimo kining P7.00.
Sumala pa ni Pe nga makiangayon lang nga paubsan na ang pletihan tungod kay sagunson na ang pag-ubos sa presyo sa produktong petrolyo. Miabot og kapin sa P50 ang matag litro sa gasolina ug dul-an P50 usab ang krudo kaniadto.
Apan human sa sagunson nga oil price rollback, nahimo na lang kini karong kapin sa P32 ug P38 ang matag litro sa krudo ug gasolina.
Atol sa public hearing niadtong Disyembre 16, wa magkahiusa ang mga transports groups sa ilang baruganan bahin niini.
"Wa man nay problema. Motuman mi pero kinahanglan naa mi kopya sa order kay lisud mopaubos mi sa pletihan nga way order," matud pang Ryan Benjamin Yu, general manager sa Cebu Integrated Transport Service Cooperative (CITRASCO).
Ang CITRASCO maoy kinadak-ang transport cooperative sa Central Visayas, gani dinhi sa Sugbo usa ka libo ka jeepney units ug 200 taxi units ang sakop niini.
Sukad pa niadtong Mayo 15, 2012, gimando nga P7.50 ang minimum fare sa jeepneys sa Sugbo ug sa tibuok Region 7, apan ang mga mapahimuslanong konduktor ug drayber tag P8.00 g’yud ang kuhaon kay mangatarungan nga wala sila’y tag P.25. Si Greg Perez, coordinator sa Pinagkaisang Samahan ng mga Tsuper at Operator’s Nationwide (PISTON) dinhi sa Sugbo nga nahinabi sa Banat News miingon nga andam usab nilang tumanon ang bag-o nga minimum nga pletihan.
Apan siya miingon nga kinahanglan pud unta nga moubos ang presyo sa mga nag-unang palaliton karon nga mibarato na ang presyo sa petrolyo. Sa iyang bahin, si Romeo Armamento, vice president sa National Confederation of Transport-worker Union (NCTU) miingon nga dili sila supak sa pagpakunhod sa minimum. (BANAT NEWS)