101 ka kaso napasaka sa PRO-7 sa 2014
CEBU, Philippines - Moabot sa 101 ka kaso sa mga polis ang napasaka sa Regional Investigation and Detective Management Division (RIDMD-7) sa niaging tuig ug kapin sa katunga niini ang naresolbar.
Matud ni Sr. Supt. Rey Lyndon Lawas, hepe sa RIDMD-7, nga 60 na ang ilang naresolbar ug duna’y 41 ang padayun nga gihusay.
Kasagaran sa mga kaso’ng giatubang sa mga polis ang grave misconduct, serious neglect of duty, less grave misconduct ug serious irregularity in the performance of duty.
Ang Cebu City Police Office ang nag-una sa mga buhatan sa kapolisan nga adunay daghang mga sakop nga gireklamo.
Gisundan sa Cebu Provincial Police Office, Negros Oriental Provincial Police Office, Bohol Provincial Police Office, Regional Headquarters, Regional Public Safety Battalion-7, Mandaue City Police Office ug Lapu-Lapu City Police Office.
Sa kinatibuk-an, dunay 23 ka polis ang natangtang sa serbisyo, 29 ang nasuspenso, lima ang naabswelto, lima ka kaso ang nabasura ug dunay usa ang gi-demote sa ranggo.
Gipasabot ni Lawas nga sa 101 ka reklamo, adunay usa nga non-uniform police o NUP nga nag-atubang og kaso’ng grave misconduct.
Nabantayan ni Lawas nga daghan nga mga polis ang gireklamo gumikan kay duna’y uban nga misulod lang pagka-polis kay wala na’y laing masudlan nga trabaho.
Kini ang ilang plano nga usbon nga batasan sa mga gusto’ng mosulod sa serbisyo. (BANAT NEWS)
- Latest
