CEBU, Philippines – Giisa sa heighten alert ang kapolisan sa dakbayan sa Sugbo sugod karong adlawa isip pagpangandam sa Sinulog 2015. Matud sa officer-in-charge sa Cebu City Police Office, Sr. Supt. Conrad Capa, nga iyang gituyo nga sayo nga ipatuman ang heighten alert.
Si Capa miingon nga wala na unya’y tugutan nga mga polis nga maka-leave ug kadtong nakabakasyon pabalikon na sa ilang trabaho.
Karong adlawa may himuon nga tigum ang Sinulog Foundation,Inc. ug sa kapolisan aron hisgutan ang mga kalihukan ug ang seguridad sa mga umaabot nga kalihukan.
Matud ni Capa ipakatap usab ang kapolisan sa mga lugar nga may himuon nga street party.
Gipasabot ni Capa nga sa kapin libo unta ka polis nga gihangyo sa CCPO gikan sa Police Regional Office-7, moabot na lang sa 700 ka polis ang gilauman nga makuha aron madugang sa pwersa sanglit ang uban gipadala na sa siyudad sa Tacloban alang sa Papal visit. – /GMR) (BANAT NEWS)