Daghang dayo nga contingents ang mangapil

CEBU, Philippines – Bisan pa man sa mga kalamidad nga niigo sa nagkadaiyang bahin sa nasud sa mga miaging tuig, gibutyag sa Sinulog Foundation nga mas daghan ang mipadayag nga buot mosalmot nga out of town contingents itandi sa niaging tuig.

Sa milabay nga tuig unom lang ka mga out of town contingents ang nisalmot sa Sinulog Grand Parade apan karong tuiga  siyam na ka mga out of town contingents ang miapil.

Gitug-an ni Ricky Ballesteros, executive director sa Sinulog Foundation Inc. nga ang first time nga mosalmot sa Sinulog grand parade ang Catbalogan, Samar, usa sa grabeng naapektuhan sa Bagyong Yolanda ug Seniang.

Gani, upat sa orihinal nga miyembro sa ilang dancers ang namatay human mabiktima sa pagdahili sa yuta sa Bagyong Seniang.

Apan bisan pa man nga namatyan ang grupo, matud ni Ballesteros nga gikompirmar sa ilang choreographer nga mahinayon gihapon ang ilang pagsalmot agi’g paghalad ug saad ngadto sa Balaang Bata.

Lakip sa nikompirmar nga mosalmot sa grand parade mao ang nabantog na usab nga Placer Masbate, Masbate City, North Cotabato, Tangub City; Probinsya sa Lanao del Norte; Abuyog, Leyte; Alang-alang ,Leyte ug sa ikaduhang higayon mosalmot usab ang Panglao, Bohol.

Samtang nagkinahanglan og 42 ngadto na sa 45 milyones pesos ang SFI nga maoy gastuhon alang sa tanan nga kalihukan nga magsugod na karong Biyernes pinaagi sa usa ka parada.

Alang sa premyo sa mga mananaug P25 milyones ang igahin sa SFI.

Ang tema sa Sinulog niining tuiga gipahaom usab sa pagduaw ni Pope Francis sa atong nasud ug sa ika- 450 ka kasumaran sa pagdawat sa Kristyanismo sa nasud nga nagsugod dinhi sa Sugbo ug ika-50 ka tuig nga anibersaryo sa pagdeklarar sa simbahan sa Sto. Niño nga Basilica Minore niadtong tuig 1965.

Gipanglantawan usab ni Ballesteros nga posibleng makunhuran ang mga manan-away sa Sinulog Grand Parade kay posibleng matunga ang mga tawo sa Santos nga Misa ni Pope Francis sa Luneta Park sa Manila, apan minilyon gihapon sa mga deboto ug turista ang gipanglantawan nga mosalmot ug mosaksi sa Sinulog. – /EIM) (BANAT NEWS)